Infiltrate

Infiltrate (2026)

ဒီတစ်ခါတော့အက်ရှင်နဲ့ သည်းထိတ်ရင်ဖို ဇာတ်ကားကြိုက်တဲ့သူတွေအတွက် မကြာသေးခင်ကမှ ထွက်ရှိထားတဲ့ Infiltrate (2026) ရုပ်ရှင်ကားလေးအကြောင်း တင်ပေးထားပါတယ်။

ဒီကားကို ဒါရိုက်တာ James Mark က ရိုက်ကူးထားပြီး မင်းသမီး Orphée Ladouceur-Nguyen၊ မင်းသား Tim Rozon နဲ့ Alain Moussi တို့ ပါဝင်သရုပ်ဆောင်ထားကြပါတယ်။

ဇာတ်လမ်းအကျဉ်း

အစိုးရအေးဂျင့် လီလီချန်း ဆိုတဲ့ အမျိုးသမီးတစ်ယောက်အကြောင်းပါ။ သူက တော်တော်လေး စွမ်းဆောင်ရည်ပြည့်ဝတဲ့ အေးဂျင့်တစ်ယောက်ဖြစ်ပြီး မာဆယ် လာဖလူး ဆိုတဲ့ ရာဇဝတ်ဂိုဏ်းခေါင်းဆောင်ကြီးကို ဖြိုခွင်းဖို့ လပိုင်းလောက် အချိန်ယူပြီး ကြိုးစားနေတာပါ။ ဒါပေမဲ့ တစ်နေ့မှာတော့ သူ့ယောက်ျားဖြစ်တဲ့ ဂျွန် ပြန်ပေးဆွဲခံလိုက်ရပါတယ်။

အဲဒီအချိန်မှာ သူ့ဆီကို အမည်မသိဖုန်းတစ်ကောလ် ဝင်လာပြီး သူ့ယောက်ျားကို အသက်ရှင်လျက် လိုချင်ရင် သူတို့ခိုင်းတဲ့ ရာဇဝတ်ကောင်တွေကို လိုက်သတ်ပေးဖို့ ခြိမ်းခြောက်ပါတော့တယ်။ ဒီလိုနဲ့ လီလီချန်း တစ်ယောက် သူ့ယောက်ျားကို ကယ်ဖို့အတွက် တာဝန်နဲ့မိသားစုကြား ဗျာများရပြီး မလုပ်ချင်ဘဲနဲ့ မြေအောက်ရာဇဝတ်လောကထဲကို ဝင်ရောက်သွားရပါတော့တယ်။

သူ့ယောက်ျားကိုရော အချိန်မီ ကယ်တင်နိုင်မလား၊ သူ့ကို ခိုင်းစေနေတဲ့ နောက်ကွယ်က လူတွေကရော ဘယ်သူတွေလဲ၊ သူ ဖြိုခွင်းချင်နေတဲ့ မာဆယ် လာဖလူး နဲ့ရော ဘယ်လိုတွေ ထိပ်တိုက်တွေ့မလဲ ဆိုတာကို အက်ရှင်ခန်း ခပ်ကြမ်းကြမ်းတွေနဲ့ ကြည့်ရှုရမယ့် ကားကောင်းလေး တစ်ကားဖြစ်ပါတယ်။

မင်းသမီး Orphée Ladouceur-Nguyen က စတန့်မင်းသမီးဖြစ်တဲ့အတွက် အက်ရှင်ဖိုက်တင်ခန်းတွေကတော့ တော်တော်လေးကို ကြည့်ကောင်းပါတယ်။