Ick

Ick (2025)

IMDb Rating (5.2) / Rotten Tomatoes (68%)

Superman မင်းသားဟောင်းကြီး Brandon Routh ရဲ့ Comeback လို့ဆိုရမဲ့ ဇာတ်ကားသစ်ဖြစ်ပါတယ်။ ခေတ်ပေါ်လူ့အဖွဲ့အစည်းရဲ့ရေပေါ်ဆီ၊ အပေါ်ယံဆန်မှုတွေ၊ လွဲချော်မှုတွေကိုသိပ္ပံဟော်ရာဇာတ်ကြောင်းနောက်ခံနဲ့ သရော်ထားတဲ့ Satire Comedy ဇာတ်ကားကောင်းတစ်ကားလည်းဖြစ်ပါတယ်။

ဇာတ်လမ်းအကျဉ်းအနေနဲ့ အိစ်ဘရွတ်ခ်မြို့ကို အစ်ခ်(ICK) လို့အများခေါ်ကြတဲ့ အမည်မသိကပ်ပါးမျိုးစိတ်တစ်မျိုးဟာ ရောက်ရှိရှင်သန်နေတာကြာပြီဖြစ်ပါတယ်။ အပင်တွေနဲ့ဆင်တူပြီးမြို့အနှံ့ပြန့်ပွားနေပေမဲ့ ဘယ်သူ့ကိုမှ အန္တရာယ်မပေးတဲ့အတွက် မြို့ခံတွေက စိတ်မဝင်စားသလို အရေးလည်းမလုပ်ကြပါဘူး။ အစိုးရနဲ့ကျွမ်းကျင်သူတွေရဲ့သတိပေးမှုတွေကိုလည်း ကောလဟာလ လိုလို ဝါဒဖြန့်တာလိုလိုသဘောထားပြီး အစားမပျက်အသွားမပျက်ကြပါဘူး။

ဒီလိုနဲ့တစ်ညမှာ နှစ်ပေါင်းများစွာ ငြိမ်သက်လာခဲ့တဲ့ အစ်ခ်ရဲ့ တိုက်ခိုက်မှုတစ်ခု စတင်ဖြစ်ပေါ်လာခဲ့တဲ့အချိန်ထိတောင် ဘယ်သူမှ မတုန်လှုပ်ကြသေးပါဘူး။ အိစ်ဘရွတ်ခ်အထက်တန်းကျောင်းရဲ့ Prom Night ကိုဖျက်သိမ်းဖို့အာဏာပိုင်တွေဘက်က ပြောခဲ့တာကိုလည်း ခေါင်းမာမာနဲ့တစ်မြို့လုံး တက်ညီလက်ညီဆက်လုပ်ကြဦးမှာပါ။

အဲ့ဒီလိုလူ့အသိုင်းအဝိုင်းနဲ့တစ်မြို့လုံးကိုဗုန်းဗုန်းလဲသွားအောင် အန္တရာယ်ပေးနိုင်တဲ့ ကပ်ပါးသက်ရှိတစ်မျိုး၊ ရှေ့ဆက် ဘယ်လိုနှစ်ပါးသွားကြမလဲဆိုတာကို ဟာသနှောပြီး သွက်သွက်လက်လက်တင်ဆက်ထားတဲ့ ဇာတ်ကားဖြစ်ပါတယ်။

ဂြိုလ်သားကျူးကျော်မှုအခြေခံတဲ့ နာမည်ကျော် သိပ္ပံဟော်ရာတွေဖြစ်တဲ့ 90s  ဂန္ထဝင် Faculty 1998 တို့  Body Snatchers 1993 တို့ရဲ့အငွေ့အသက်တွေ အများကြီးတွေ့ရပြီး အဓိကဇာတ်ဆောင်မင်းသားဖြစ်တဲ့ Brandon Routh  ရဲ့ဆယ်ကျော်သက်ဘ၀ကို ကိုယ်စားပြုတဲ့အနေနဲ့ Millennials တွေအတွက် အတိတ်ကိုပြန်လွမ်းဆွတ်စရာ နာမည်ကျော် 2000s သီချင်းတွေကိုအများကြီးအသုံးပြုထားပါတယ်။ ဒီတော့ 90s vibe ရုပ်ရှင်တွေ၊ 2000s ခေတ်သီချင်းတွေနဲ့ မျက်မှောက်ခေတ်ကာလကို သရော်ထားတဲ့ သိပ္ပံဟာသ ဇာတ်ကားကောင်းတစ်ကားလို့ညွှန်းရင် မှားမယ်မထင်ပါဘူး။

• alien
• alien invasion