This, That, and Everything in Between

This, That and Everything in Between (2026)
********************************************

Netflix မှာ မကြာသေးမီကမှ ပူပူနွေးနွေးထွက်ရှိထားတဲ့ ဖိလစ်ပိုင် မိသားစု ဟာသဒရမ်မာရုပ်ရှင်ကားလေးပါ။ ဖိလစ်ပိုင်နာမည်ကြီး မင်းသမီးကြီး Jodi Sta. Maria နဲ့ Agot Isidro တို့ အဓိကခေါင်းဆောင် ပါဝင်သရုပ်ဆောင်ထားကြပါတယ်။

ဇာတ်လမ်းက Joanne (Jodi Sta. Maria) ဆိုတဲ့ အောင်မြင်တဲ့ TV ဇာတ်ညွှန်းရေးဆရာမလေးအကြောင်းပါ။ Joanne ဟာ ငယ်စဉ်ကတည်းက မိခင်ဖြစ်သူရဲ့ စွန့်ပစ်ခြင်းကို ခံခဲ့ရသူမို့ အတိတ်ဒဏ်ရာတွေကို ကျော်ဖြတ်ပြီး သူ့ဘဝကို အစစအရာရာ စနစ်တကျ ပြန်လည်တည်ဆောက်ထားတဲ့ အမျိုးသမီးတစ်ယောက်ဖြစ်ပါတယ်။

ဒါပေမဲ့ တစ်ရက်မှာတော့ သူ့ကိုပစ်သွားခဲ့တဲ့ မိခင်ဖြစ်သူ Paz (Agot Isidro) ဟာ ၂၇ နှစ်အကြာ မှာ ရုတ်တရက် ပြန်လည်ရောက်ရှိလာပါတယ်။ ဒါတင်မကသေးဘဲ Paz မှာ မိသားစုတစ်ခုလုံးကို ရိုက်ခတ်သွားစေမဲ့ လျှို့ဝှက်ချက်တစ်ခုပါ ပါလာတဲ့အခါမှာတော့…

မိခင်နဲ့ သမီးကြားက နှစ်ပေါင်းများစွာ ကင်းကွာခဲ့မှု၊ နာကျည်းချက်တွေ၊ စွန့်ပစ်ခံရတဲ့ဒဏ်ရာတွေနဲ့ မပြေလည်ခဲ့တဲ့အမုန်းတရားတွေ ပြန်လည်စိမ့်ထွက်လာပါတော့တယ်။ ဇာတ်လမ်းက သမားရိုးကျ ဝမ်းနည်းစရာဒရာမာကြီးပဲ မဟုတ်ဘဲ ဖိလစ်ပိုင်မိသားစုတွေရဲ့ ရှုပ်ထွေးလှတဲ့သံယောဇဉ်၊ ခွင့်လွှတ်ခြင်းနဲ့ ဟာသအငွေ့အသက်လေးတွေကိုပါ မျှမျှတတ ရောနှောပြသထားတာမို့ ရင်ထဲထိစရာရော၊ ပြုံးစရာရော ပါဝင်ပါတယ်။

ဒီဇာတ်ကားဟာ ပရိသတ်တွေဆီကနေ ၁၀ မှတ်မှာ ၇.၂ မှတ်ကနေ ၇.၈ မှတ်ဝန်းကျင်အထိ ရရှိထားတာမို့ မိသားစု Drama ကားတစ်ကားအနေနဲ့ Rating တော်တော်လေးကောင်းမွန်တဲ့အထဲ ပါပါတယ်။ ပရိသတ်တွေနဲ့ ဝေဖန်ရေးသမားအများစုက မင်းသမီးကြီး Jodi Sta. Maria နဲ့ Agot Isidro တို့ရဲ့ သဘာဝကျလွန်းတဲ့ သရုပ်ဆောင်ချက်တွေကို အဓိက ချီးကျူးထားကြတာပါ။

မိခင်နဲ့သမီးကြားက နာကျည်းချက်တွေ၊ ခွင့်လွှတ်ခြင်းနဲ့ မိသားစုသံယောဇဉ်ကို ရင်ထဲထိအောင် ပုံဖော်ထားနိုင်တာကြောင့် ကြည့်ရှုသူအများစုဆီကနေ တုံ့ပြန်မှုကောင်းတွေ အများကြီးရရှိထားတဲ့ ရုပ်ရှင်ကားလေးပဲ ဖြစ်ပါတယ်။