Mr. Vampire

ဒီဇာတ်ကားလေးကတော့ ကျွန်တော်တို့ ငယ်ငယ်တုန်းက ကြည့်ခဲ့ရတဲ့ ခုန်ဆွခုန်ဆွ တရုတ်သရဲကားဖြစ်တဲ့ Mr.Vampire ရဲ့ ပထမဦးဆုံး ဇာတ်ကားပဲ ဖြစ်ပါတယ်။ ၁၉၈၅ တုန်းက ဇာတ်ကားဖြစ်ပေမယ့်လည်း ဇာတ်လမ်းဇာတ်ညွှန်းနဲ့ ရိုက်ချက်တွေကလည်း မညံ့သလို ကြည့်ရတာလည်း တကယ်ကောင်းတဲ့ ဇာတ်ကားတစ်ကားပါ။ ဇာတ်လမ်းအကျဉ်းပြောရရင် သရဲနိုင်တဲ့ဆရာကြီး ဆရာကန်မှာ တပည့် နှစ်ယောက် ရှိပါတယ်။ တပည့်နှစ်ယောက်ကလည်း တကယ့်ကို ငပွေးတွေပါ။ ဘယ်လို ကမြင်းရမလဲ စဉ်းစားနေတဲ့ နှစ်ကောင်ပါ။ တစ်နေ့မှာ သူဌေးတစ်ယောက်က သူ့အဖေရဲ့ အုတ်ဂူရွေ့ဖို့ အလုပ်လာအပ်ပါတယ်။ မမျှော်လင့်ထားတဲ့ တစ်ချက်က အဲ့အုတ်ဂူကိစ္စဟာ ဗေဒင်ဆရာ တစ်ယောက်ရဲ့ လက်စားချေခဲ့တဲ့ လုပ်ရပ်ဖြစ်နေတာပါပဲ။ အဲ့ကနေ အုတ်ဂူထဲက အလောင်းဟာ သူတို့ဆရာတပည့်တွေဆီ ရောက်လာပြီး အဲ့သူဌေးမိသားစုနဲ့ သူတို့ဆရာတပည့်တွေကို ကောင်းကောင်းကြီး ဒုက္ခပေးပါတော့တယ်။ သူတို့တွေ အဲ့ဒီတရုတ်သရဲကို ဘယ်လိုနှိမ့်နင်းမလဲ ဆိုတာတော့ ကိုယ်တိုင်ပဲ ကြည့်ရှုခံစားလိုက်ပါအုံး။ ပြောရရင် ဒီဇာတ်ကားဟာ ဆရာနဲ့တပည့်တွေအကြားက ဟာသအပြင် တပည့်တွေကို သရဲရန်က ကာကွယ်ပေးချင်တဲ့ ဆရာဖြစ်သူရဲ့ မေတ္တာကိုပါ မြင်တွေ့ရမှာ။ အချုပ်ပြောရရင် ထိတ်လန့်စရာတွေ၊ ရယ်စရာမောစရာတွေနဲ့ ဇာတ်ကားကောင်း တစ်ကားကို ကြည့်ချင်ရင် ဟိုးအရင်က ဇာတ်ကားဟောင်းလေးကို ပြန်လည်ခံစားကြည့်ရှုလိုက်ပါအုံးလို့ ပြောလိုက်ပါရစေ။

Source – Shwe Pann Thee